TVB劇集《破毒強人》熱播中，卡士強勁集陳豪、胡定欣、蕭正楠、張曦雯、蔣志光於一劇，朱智賢、郭柏妍及馬貫東等新生代藝員表現亦獲網民大讚，其中演社團大嫂的朱智賢日前一場自殺戲份亦引討論。
【相關閱讀】：破毒強人丨胡定欣誘惑式止血吹傷口 陳豪反攻狼撲強吻場面激烈
【點擊睇朱智賢拍自殺戲】：
《破毒強人》昨晚（18 日）劇情相當感人，淑賢（朱智賢飾）為了救老公福田 （蔣志光飾），一直咬住文華（陳豪飾）、章琳（胡定欣飾）唔放，連番以爆大鑊及報警要脅二人，其中一句：「你知唔知對於一個女人，咩重要得過佢條命？就係佢屋企人」，盡顯女人無私的愛及霸氣！縱然已竭力作多番周旋，淑賢在兩大老狐狸身上仍是不得要領，更遭章琳反佔上風著她不要妄想能救出福田，並誘導情緒激動的淑賢做福田「替死鬼」…結果救夫心切的淑賢經歷多番內心掙扎後， 終決定自殺拯救老公，臨死前更專程前往探監，忍痛為老公作最後打氣及告別…
紫唇亂髮被取笑像女鬼
昨晚淑賢自殺一幕、無論拍攝或剪接手法均十分賺人熱淚，這邊廂淑賢冒著大雨走進注滿一氧化碳的車廂中自殺，臨死前堅強又鎮定的拍下自首片段；另邊廂在探監時答應淑賢出獄後要陪跳舞的福田，則在拘留所中反覆練習，配以背景歌曲 《千言萬語》、朱智賢（朱朱）及蔣志光的深情演繹，甚是淒美。為了突顯該幕的視覺震撼，劇組為場口預備了大水車製造人造雨，被人造雨及工作人員噴至全身濕透的朱智賢，由於嘴唇被化到發紫，加上一頭亂髮，被導演取笑像女鬼，甚是爆笑。其實導演這樣做只是為朱智賢減壓，皆因朱智賢埋位前不斷嗌緊張。無綫官網昨晚播出的花絮片，鏡頭前一臉淒涼的朱智賢，甫完成拍攝已笑得相當燦爛，並向著鏡頭大叫「好玩刺激」：「淋雨嘅時候最凍覺得係個頭。」
瘋狂包保鮮紙打底保暖
及後朱朱受訪時透露拍攝當晚氣溫只有 8 度：「當時係冬天，仲要係凌晨四、五 點拍，嗰陣時得 8 度左右，我自己本身好怕凍，所以包咗好多保鮮紙打底。淋住雨做戲好難 focus，因為真係好凍，當時我好驚會喺鏡頭面前震，因為揼住雨應該好有 Feel，但無啦啦喺度震嘅話咪要 retake 咯，所以我就不停叫自己千祈唔好震。」淑賢重情重義、剛柔並重，加上朱智賢演繹得很立體，角色自出場後吸獲不少好評，風頭不輸蔣志光；朱朱受訪時透露當初接到角色時最擔心撈味太重，並謂有參考《無間道》劉嘉玲演出：「一開始我唔知應該點樣去拿捏，因為做得阿嫂應該好多人生經歷，而且要喺暗黑世界生存一定唔簡單；但另一方面我又已經做咗阿媽，又唔會『撈味太重』，所以我覺得最難拿捏係又要做得似阿嫂、又要似一位媽媽。事前準備功夫方面我就參考咗《無間道》劉嘉玲嘅角色，佢係一位江湖阿嫂，我有細心留意佢啲神態、語氣、打扮等等，希望攞到啲靈感。」
談到與蔣志光由之前《食腦喪 B》的父女升呢做夫婦，朱智賢笑言起初適應上確實有點難度：「之前習慣咗佢係爸爸，突然間變咗老公，演繹方面好唔同。我反而覺得同蔣老師做夫妻好過做父女，我身邊朋友話我哋 CP 感都 Ok。」昨晚確有網民指「福田夫婦好有愛」，並笑言：「應該拍一套前傳，講下福田愛的故事」，更有人留言：「沉痛哀悼福田嫂沈淑賢，義薄雲天」、「福田嫂對福田真係有情有義」，另還有網民指朱朱演技一套比一套進步，並讚她演得入戲又自然。
【其他文章】：
破毒強人丨張曦雯蕭正楠胡定欣三角關係終明朗 為演強悍高級女督察做足功夫
破毒強人丨陳豪曾因聲沙連收音師都嗌「救命」 割瘜肉後星途迎轉機
破毒強人丨33歲張曦雯緊身白Tee騷曲線美 完勝25歲小花郭栢妍OL Look
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
