政府將於明日發表新一份《財政預算案》，市場憧憬樓市全面撤辣，樓價或有望止跌回升。祥益地產總裁汪敦敬認為，現時市場需要更加多租盤，並應鼓勵更多人收租，惟現行樓市辣招不利增加租盤，「買樓收租唔係要打擊嘅對象。」展望樓市，他認為今年至少可以穩住陣腳，加上隨着定期減息，開始有收息客買樓，資金將流入市場。
市場需要租盤
對於預算案撤辣與否，汪敦敬不作過多猜測，但他認為撤辣對樓市會有改善，但要視乎各種因素，「唔好忘記好多香港人係揸住好幾層物業，呢一類人會唔會賣一兩個出去？咁嘅話就會造成放盤量多於成交量，即使全面撤辣，樓市都唔係老奉上升，冇保證㗎！要配合供求先可以計算到。」即使最終全面撤辣，汪敦敬不相信是一個「全民皆喜悅嘅減辣」，他指出今年還有好多考驗，例如23條立法年中才會通過，要留意社會動向。
汪敦敬認為現時市場需要更加多租盤，應該鼓勵更多人收租。因為社會已經大量開放人口進入香港，租盤需求將一直增加，但現行樓市辣招不利增加租盤，「因為買第二層樓就要收辣税，雖然稅項有減少，但係都係一個大數目。所以我覺得政府而家要諗清楚，長遠收租係咪一個短炒行為，我自己覺得就唔係，咁樣係殺錯良民，一直都唔應該針對長遠收租嘅業主，係唔應該要有辣税，買樓收租唔係要打擊嘅對象。」
樓市將見黎明
展望樓市，汪敦敬認為今年至少可以穩住陣腳，因為去年出現部份從未試過的因素，例如銀行高息定期，不少市民將大部份資金凍結於銀行體系，但隨着定期減息，開始有收息客買樓，資金流入市場。
成交量方面，他指農曆新年過後，2月第3個星期日，成交量已增加五成或以上，「係咪叫小陽春？我都唔敢嘩眾取寵，但的而且確市場正在進入一個比較好嘅情況，我覺得購買力逐漸喺銀行出緊嚟，唔係想像中咁差。」
隨着股市開始回升，他預計今年樓市會穩住陣腳而且重新起步向上，料會上升5至10%，「但我強調截至今日訪問為止，有八成嘅板塊係已經止跌，仲有部份板塊係正在沉底，例如細單位，400幾萬嘅三房、300幾萬嘅兩房，位於屯門、或其他冷門地區。」 他續指，大部份板塊已回穩，現時租金回報率高達三厘，加上定期息口回落，多了資金流入市場，「而家仲係悲情，但等待黎明嘅時間唔會太長。如果禮拜三出招冇料到就等多期，但我預計最遲都係等多一兩個月就可以搵到谷底向上。」
另外，汪敦敬認為政府應該設立年輕人置業資助貸款，助年輕人上車，他指，「而家年輕人比我哋以前仲要多咗Grant Loan（學資處資助貸款計劃），如果政府冇一個更好嘅財務安排資助年輕人上車，好多人都會中途放棄唔再買樓。」
睇好豪宅市場不會減持
同時作為資深投資者的汪敦敬，認為政府暫時已出的招數， 已對其主要投資大有幫助，「你見到較高檔次嘅豪宅市場好早已經穩定咗，有部份甚至冇跌過。商舖方面最近多咗自由行，亦令到我嘅核心舖位直接受惠，但如果再投資的話，我係需要銀行態度更穩定，而家我哋想去投資都會考慮銀行會唔會好小心，雖然我哋唔係每個物業都借錢，但係即使我哋借唔借錢都好，都會關心銀行態度。」
汪敦敬同時持有多個九龍站豪宅，他表示睇好豪宅市場，不會沽貨減磅，「喺香港大灣區一體化之下，望維港景同高鐵站一帶豪宅更加增值，當然未反映於價錢上，但對比幾年前，而家有高鐵、西九文化區，加上內地環保做得好，天色更清朗，我每日起身都睇到日出，維港一帶豪宅會進一步成為大灣區核心。」
回應三年前豪言
疫情期間，汪敦敬以逾億元買入尖沙咀、銅鑼灣等舖位，2021年曾接受傳媒訪問時豪言，「三年後你會後悔冇抓緊機會入市」，三年過去，此番言論成為網民最近熱話，汪敦敬就事件回應，「可以用返今日（26日）報道去回應，我三年前將漢口道舖位租畀Bakehouse，而家嘅租金已經加咗38%，如果我三年前做咗份租約，三年後仍然可以加租38%，我覺得係有配合到我當初講嘅嗰一句說話，當然冇可能絕對性每個人都啱用，一個好嘅收租回報率係我預期，但我唔會預期而家賣舖，因為呢個係至少10年嘅投資，喺我嘅計劃嚟講，三年前買鋪係啱，三年前仍然有好多機會係享受到，例如低息環境，當然任何投資都有升有跌，我會承擔投資風險同埋享受機會。」
漢口道長龍烘焙店Bakehouse，建築面積約1000方呎，兩年來，月租由18萬勁加至25萬，幅度38%。舖主汪敦敬表示：「我們和租客都互相投資落對方，開始時（2021年10月），我們給予18萬平租，一年後加至20萬，去年10月踏入第3年，月租加至25萬。」他又說：「此舖位巷仔單邊，我特地將巷仔粉飾一番，舖前行人路特別闊，本身栽種樹木，有情調，適合排隊！Bakehouse蛋撻一件售價約12元，以月租25萬計算，日賣逾670件蛋撻足夠交租。
相關文章：
小紅書打卡店撐起二線街舖 Bakehouse兩年加租38% 日賣670件蛋撻夠交租
---
【上車驗樓，星島搵專家幫你手！如果你有新盤驗樓、裝修分享，請即Email：[email protected] 】
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
