星8卦｜「小生」扮鍾意女仔溝掂「馬騮」 放唔低「短腳」情路多磨
「小生」真係叻仔，將自己真正嘅性取向隱藏，呢種雌雄莫辨嘅錯摸，反而令囝囝囡囡都有幻想空間。一直大家都奇怪「小生」點解可以咁橫行，見到大機構嗰位「勢利」將佢帶出帶入，就知道「小生」家境一定唔錯，仲肯定畀咗好多好處「勢利」𠻹。
「小生」有一排狂追「馬騮」幾乎擺晒上枱畀人知，大家以為「馬騮」今次終於泊到好碼頭，「小生」又好似做到好深情認真，「馬騮」直情春風滿面啦！但奇就奇在「小生」太過君子，攬攬錫錫嘅程度都唔似好熱戀咁，「馬騮」開到聲問佢係咪有童年創傷，「小生」都話自己比較慢熱啫。
事情到而家都解決唔到㗎，兩個人好似有嘢，但只有當事人至明中間嘅微妙之處。「馬騮」覺得佢都係一個好人，又叫有啲家底，好似買嘢畀自己，「小生」都算大方，佢覺得多咗個異性知己多啲而唔係男朋友。
最近「小生」終於肯坦白，原來佢最愛係當日一齊比賽嘅「短腳」，對方衰在放唔低識於微時嘅「哥仔」，所以無辦法同「小生」行遠啲。加埋屋企唔接受，佢就試吓同女仔，「馬騮」性格爽朗又有大家姐風範，自問對佢係有好感，呢種矛盾心情，「馬騮」又好體諒，反正自己又未有目標人物，咪由得呢段霧水情緣繼續囉！
相關文章：
星8卦｜「高瘦」被阿媽逼嫁入豪門 奶奶自出自入無私隱搞到情緒病
星8卦｜「霸姐」食盡小鮮肉想定落嚟 招惹「扮嘢」痴戀唔敢落疊
緊貼最新最快新聞資訊，請立即下載星島頭條App：https://bit.ly/3Q29Vow
