45歲卓韻芝（阿芝）因一次冰島險死之旅，突然叮一聲，決定相隔5年再開騷《芝姐災難大全》，同觀眾分享人生及婚姻觀。對於前年跟結婚4年的美術指導梁子賢離婚，阿芝唔怕揭開傷口，公開離婚原因跟相處太客氣有關，至於乖孫婚姻失敗，阿芝笑言相依為命多年的94歲婆婆零傷感，更聯同印傭一齊食花生取笑佢，相當好笑。採訪：杜杜 攝影：Stanley 髮型:Marvin@shhh_group 場地:Little Tai Hang@littletaihang
阿芝再開騷是因為想賺錢又想威，同時展露自己的初心。《芝姐》以她年前一次冰島之旅作主線，「每樣計劃都唔同晒，係骨牌式失敗嘅旅程，talk show越悲哀係越好笑，睇見他人受難實在係太好嘅娛樂嘞！」阿芝跟朋友自駕遊冰島，發生了跟死亡很接近的交通意外，令她認真反思人生及審視自己婚姻，「依家都巿人都有90歲，我𠵱家歲數（45歲）真係啱啱好鎅開一半，我諗下半生應該點樣過？！」
煲咗湯仍然預埋前夫
2018年的《呃呃氹氹One Night Stand》，當時阿芝跟梁子賢新婚，對方還甜蜜撐場，但原來兩人相處一直有道永遠跨不過的牆，「我哋係好有禮貌嘅人，好客氣，朋友都話『其實你一直都係叫佢丈夫先生，即係Mr. Husband，點解感覺咁唔親暱嘅？！』我話唔知，我哋返到屋企都係好客氣。」她想到唯一原因跟原生家庭有關，「我爸爸媽媽離婚時好唔開心，變咗自己都會步步為營，唔可以太過自把自為，講嘢要小心，反而同朋友就直接講，可能特別想保護呢個關係，結果就好客氣，兩個人好難直接咁開口講嘢，有傾偈都係啲日常生活嘅嘢，而唔係內心嘅揭示。」
阿芝慶幸跟前夫關係較單純，能夠和平分手，「我哋冇小朋友相對自由，又冇共同生意，釐清相對容易亦少啲拗撬，我哋都好守護一樣嘢，就係點都好，大家一定要好嚟好去。」阿芝跟前夫已變了家人關係，「煲咗啲咩湯，會問佢『你得唔得閒過嚟攞壺湯』。」分開後兩人相處依然客氣，「可能客氣咗個頭，同埋佢真係好好人，個人好善良，唔係一個講嘢好盡嘅人，對住一個咁嘅朋友，我亦都唔會好盡。」現在單身的她並不急於拍拖，亦繼續相信婚姻，「有就拍囉！𠵱家冇呀，我係咪要玩吓交友app，哈哈！如果有人要我或者喜歡我，都會努力嘗試，卓韻芝都係個勇往直前嘅人，所學嘅嘢唔會白費，就算有冇下段戀愛或者婚姻，我都學習咗做一個更加坦誠嘅人。」
受婆婆人生哲學影響
阿芝稱94歲婆婆得知她離婚，沒有預期傷感，反而抱著食花生心情，境界相當高，「嗰日鼓起勇氣食飯同佢講，食到尾聲先講怕佢食唔落嘢，點知我一講佢就笑我嘞，佢話『你自己揀啦，哈哈，傻㗎你』，佢覺得自由戀愛年代，揀呢個人又係你自己揀，分開都係自己揀，側邊嗰個人可以做嘅就係取笑你囉！過幾日諗住佢會忘記，點知睇電視睇到日本食和牛，佢突然話『芝芝呀，我不如陪你去呢度散心』，佢諗住『公器私用』，真係個好可恥嘅人嚟，哈哈！」最搞笑連印尼籍家傭LuLu亦笑埋阿芝一份，「佢成日同阿婆連線，佢哋勁friend，有日電視播緊峇里嘅畫面，我話『LuLu你家鄉，呢度勁靚，勁多人喺嗰度影結婚相』，佢就話『你呀！下次啦』，阿婆喺度偷笑，點樣呀？！呢個家冇人安慰我，淨係恥笑我。」
婆婆睇得開，阿芝認為跟她經歷有關，「佢經歷過二戰、她媽媽小產、爸爸戒鴉片死、老公喺佢後生時死咗，亦都死咗個女即係我媽咪，佢經歷過極多創傷，但好犀利，經歷咁多創傷，到最後仍然保存一種透明感，唔會悲天憫人，佢係我偶像，無論經歷過咩，最後都好有空氣感做人，所有嘢都好輕巧。」阿婆的人生哲學亦有影響了她，「佢同我係極端相反，我好多嘢諗好多思考，佢係乜嘢都唔思考，𠵱家都係左右唔識分，有次喺樓下見到楊天命，佢話你阿婆已經成咗仙，真係將憾事放低晒，冇咁多包袱，往事發生咗就發生咗，唔會當包袱咁去孭。」
由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊https://bit.ly/4csd4qL
緊貼最新最快新聞資訊，請立即下載星島頭條App：https://bit.ly/3Q29Vow
