劉威煌孖譚輝智顏米羔等搞首隊中年男團狂搵錢《好聲音》之友鍾意飲鹹檸七鹹出真友誼丨獨家

《中年好聲音》系列叫好叫座，帶挈「中一生」及「中二生」係咁接Job，更衍生首隊男團「輕鬆啲」(HZD)合體搵商機。「輕鬆啲」由「中二生」劉威煌、譚輝智、顏米羔、梁浩賢、甘永傑、梁思傑、潘文龍及王嘉明組成，「隊長」劉威煌透露，中佬8子除每周做直播外，未來還打算搞旅行團、飲食博覽等，發展空間非常大，總之人人有工開，梁浩賢更笑言既然溫拿告別，就由他們來接棒。採訪：方騫平攝影：朱偉彥場地：Midtown

「輕鬆啲」(HZD)由「中二生」譚輝智(左起)、潘文龍、梁浩賢、甘永傑、梁思傑、王嘉明、顏米羔及劉威煌(中)8子組成。

「鬆啲7友」笑住「指責」譚輝智自私食車仔麵。

「輕鬆啲」(HZD)8子鍾意飲鹹檸七鹹出真友誼。

梁浩賢(左起)、譚輝智、劉威煌、顏米羔、王嘉明係志同道合好兄弟。

潘文龍(左起)、梁思傑、甘永傑較低調。

譚輝智買得一碗車仔麵「自隊」。

連續4年舉行個唱的劉威煌，8月10至11日再開Show，主題為「Reunite（重聚）」，成為演唱會最終章，威煌解釋籌備一個Show太辛苦，之後要停一段時間才再做：「𠵱家我多咗一班志同道合嘅兄弟一齊玩，發展更多。」

今次威煌演出主題為「Reunite（重聚）」。

劉威煌連續4年舉行個唱。

劉威煌將於8月10至11日再開Show。

劉威煌有一班鐵粉。

以輝智為首接溫拿棒

問到「鬆啲7友」如何瞓身力撐威煌？輝智二話不說提出要除衫助慶：「畀唔畀除衫呀？」米羔要求幫手賣嘢吸粉；王嘉明建議去盡啲飲滾油…當大家開始你一句我一句時，威煌表明已有構思，卻未知能否實現到，但肯定唔會要班兄弟上台齋唱「消費」佢哋。笑問係咪會勁歌熱舞硬撼MIRROR？米羔即耍手擰頭：「我哋只得8個人點都唔夠照喎，佢哋有12子勁咁多。」唔聲唔聲嘅梁浩賢突然彈出：「其實我哋想組男團好耐，我哋年代係睇溫拿樂隊，既然佢哋開終極告別騷，咁交畀我哋去接棒，我哋呢度都有貌似陳友嘅甘永傑，大家一齊學習及發揮溫拿精神。」語畢，隊友即推舉譚輝智做「譚校長」；鍾鎮濤係「光頭仔」王嘉明，因為他跟阿B係多年老友。

「輕鬆啲」之前做譚輝智個唱嘉賓。

逢星期四22:22會合體做直播節目。

「輕鬆啲」節目每周4晚帶出歡樂。

「輕鬆啲」兄弟撐譚輝智開騷。

兄弟準備上台演出。

兄弟常相聚。

走埋會吹啲無聊又冇乜「營養嘅嘢」。

劉威煌(右起)、顏米羔、梁浩賢好老友。

譚輝智、顏米羔表情趣怪。

鬆啲們無分彼此。

劉威煌、梁浩賢、譚輝智床照。

王嘉明和溫拿成員好老友。

王嘉明認識鍾鎮濤多年。

拉姑愛屋及烏畀意見

原來男團「輕鬆啲」喺冇心插柳，忽發奇想下誔生。譚輝智爆出因為8子口味相近，都鍾意飲鹹檸七，大家由愛鹹開始展開友誼！「隊長」稱一班人聚埋係講緣份，由最初只得他和顏米羔、梁浩賢、梁思傑、王嘉明好啱傾，之後愈來愈多成員加入。大家每周會「吹雞」食飯飲嘢，期間會吹啲無聊又冇乜「營養嘅嘢」，但又幾好笑，後來索性由龍導(潘文龍)改團名進軍網上直播，主旨係拋開煩惱，每周4晚帶出歡樂，陪大家兩小時。米羔補充：「我哋就好似做《EYT》咁。」「隊長」說：「我哋除唱歌，仲會跟網民有互動，坐低講吓啲唔同話題，另外，輪住拍片分享22分鐘生活日常，好似梁思傑直播煎燶邊流心蛋及煮公翅(公仔麵加碗仔翅)咁同樣受歡迎。」他還透露「輕鬆啲」有無限可能：「演唱會以外，可以搞旅行團、飲食博覽、短視頻、甚至接廣告等。」他更感激最愛輝智嘅拉姑愛屋及烏：「佢會追睇直播，仲會mark低啲point畀意見，如提醒我哋講嘢唔好咁胡鬧，節目中陽氣太重，要請返啲女嘉賓中和吓，除此之外會分享圈中多年心得，最緊要唔好太自我，喺啱嘅時間做啱嘅嘢。」

拉姑愛屋及烏錫埋「輕鬆啲」其他成員。

譚輝智唔敢做拉姑契仔。

輝智去首映捧謝霆鋒場。

梁思傑直播煎燶邊流心蛋及煮公翅(公仔麵加碗仔翅)。

條片好爆。

譚輝智、顏米羔及劉威煌用「輕鬆啲」角度出發拍書包廣告。

唔會由利益角度出發

提到成員知名度不一，「隊長」唔擔心被譚輝智搶晒FO：「我哋行單時就各自努力，合體時係一Group人，大家一條心，有自己嘢做就去做，合作模式好輕鬆舒服，而且我哋都唔係細路仔啦，大家出席首映禮會好有隊形，反而會互推企C位，唔會由利益角度出發。」米羔附和，表示幾十歲人乜都試過，唔會計較；梁浩賢強調8人唔分高低；甘永傑說要分工合作；王嘉明聲稱冇怨言，自己出道最早「目標」最大；輝智聽完大笑說：「其實我係黐佢哋，有得玩就玩！」