江旻憓在2024巴黎奧運個人女子重劍為港摘下本屆首面金牌，返港後不忘感謝前輩為運動付出，讓新一輩有更多資源去追夢，更認為香港做運動員好幸福！不過，28年前為香港奪得奧運第一金的「風之后」李麗珊，坦言當年做運動員唔容易，辛酸史一大堆，為追夢耗盡積蓄之餘，第一年去歐洲集訓，更慘到要瞓沙灘，甚至要求餐廳收平啲。採訪：方騫平 攝影：羅安強
李麗珊再為開電視主持《巴黎奧運2024》，因為唔會亂插咀而獲讚，又曾在直播提及無論奪金的江旻憓，還是無緣進入決賽的「體操王子」石偉雄(石仔)都值得敬重及支持，網民大讚有同理心，是冠軍運動員典範，珊珊表示只是感同身受，又稱從江旻憓訪問中有新體驗，「佢咬實牙關打逆境劍，原來目標唔係為自己，係要滿足其他人，唔想令教練失望，想大家睇得開心啲，回想當年自己嘅金句：『香港運動員唔係垃圾。』深信運動員真係屈咗好耐。」
冒浸死出戰釜山亞運
珊珊當年亦試過負傷作戰：「2002年10月出戰釜山亞運，出賽前腹部經已劇痛，當時隊醫、教練及隊友(現時老公)黃德森都話『你係咪應該咁搏呢？要唔要考慮退出？』尤其擔心滑浪風帆唔喺陸上作賽，風帆得一個人，任何人都唔可以接近，如果痛到暈倒跌落海就會浸死，冇人可以喺短時間內救到我，咁值唔值得呢？」珊珊抱住「亞運中奪金係我個夢，訓練咗咁多年冇可能放棄！」忍痛堅持直至完成賽事，「最後真係頂唔順，要用快艇送埋岸，然後上十字車，連獎牌都冇拎已返港。」珊珊好明白運動員心情，都想喺奧運舞台發揮應有水平，完成夢想。「石仔過去幾年受傷患困擾，為趕上拎奧運『入場券』兩度返港打止痛針，都係想兌現東奧時許下嘅承諾，衝第3個奧運。」
當年做運動員少資源
提到𠵱家做香港運動員較多資源，摘金獎金亦較當年100萬多，她說：「唔好衡量錢，由零到100萬經已好開心，對運動員係鼓勵。不過，當年資源有限，營養師、物理治療師唔太多，咁我又明白嘅，『餅仔』得咁大，有好成績先分得到；𠵱家資源多咗，係人都想香港體壇發展得越嚟越好，多資源係好事，所以成績成正比，運動員對訓練器材要求好高，而且冇資點樣出去參賽汲取經驗呀？」珊珊當年走遍歐洲做高水平訓練，乘機參加巡迴賽：「最難忘1990年第一次去歐洲集訓，由於budget唔多，到達最後一站比利時，連埋教練4人團隊要慳到捱冷瞓沙灘，甚至露天煮飯食，點知瞓醒發現露營餐具被偷，唯有大膽請求中國餐館老闆『收平啲』，承諾會介紹更多運動員幫襯，老闆唔止答應，連日煲湯畀我哋飲，到離開時，仲依依不捨攬住我哋喊。」
寄語港人為香港努力
另一件發生在挪威的往事亦非常深刻：「當地人早食飯，我哋晚上6點幾到達中國餐館時，食材已所淨無幾，老闆見我哋想食豆腐，馬上駕車回家攞，佢哋真係好好。雖然辛酸但值得，呢啲經歷加埋人情味，老咗回味都幾好。」珊珊補充，當年提出以超級折頭食飯係逼不得已：「冇法子，銀包得咁多錢，唔講價嘅話，畀咗呢餐可能下餐食唔到(唔私下貼錢？)有呀，第一次去歐洲個個攬住銀行積蓄去，但屋企超級窮積蓄唔多，仲要多得舅父資助我，10兄弟姊妹幫我照顧屋企畀我去追夢。」另外，她指香港人見到運動員的拼搏精神，亦係目前香港最需要嘅嘢，寄語大家，「香港人繼續努力為香建設美好將來；運動員就繼續追夢。」
