Previous Next
現年51歲的喬寶寶於今年3月離開香港,往蘇格蘭與早已移民當地的家人團聚,但短短5個多月,他難頂戲癮返港拍電影《時代》及中印獨立電影《我男友係好差》,完成手上工作後,昨日喬寶寶又起程返去「交人」,兼且趕返去同細仔慶祝牛一。他喺社交網站上戴咗一張位於航機經濟客艙內嘅照片,相中戴住帽子、口罩及眼鏡嘅寶寶坐喺中間座位,左右都被兩位男乘客夾實,驟眼睇都坐得有啲迫夾,飛長途就真係坐得有啲唔舒服喇!

 

喬寶寶用英文留言:「好快可以見返美麗嘅香港。返緊我第二個家鄉蘇格蘭嘅途上,抱歉,我又大隻咗啲,搞到兩個乘客要左搖右擺!」

 

咁又係嘅,過住半退休,冇憂冇慮嘅喬寶寶愈嚟愈幸福肥,睇返之前TVB重播劇《高朋滿座》,13年前嘅喬寶寶身形比𠵱家瘦足兩個碼,目前體重超過200磅,唔使諗,梗係喬嫂嫂伙食太好。不過,喬寶寶唔係大食懶,佢反而好恨有工開,留言話:「好快可以見返美麗嘅香港。」估計係短期內再拆返,大家好期待寶寶開心回歸。