短片講一對男女騙徒,以鍍金金鏈當做真金,想拎入當舖賣個好價錢,由女騙徒出馬,特登揀後生仔當舖職員落手。喺片段見到,女騙徒着低胸緊身衣入當舖,施展冧功,以美貌令職員分心,冇驗明金鏈真偽,好彩被老闆娘識破,女騙徒事敗逃去。
呢段片引嚟網上引起好大迴響,網民大讚「神級選角」,焦點放喺飾演靚女騙徒嘅Heily Ma(圓圖)身上,就連Kelly都忍唔住望多兩眼,原來佢自○九年開始喺港台做特約演員,佢昨天喺fb Share返呢段片,有網民讚佢靚女之餘,仲話佢好戲。而飾演男騙徒嘅演員吳良榮亦係好戲之人,狡滑嘅表情令Kelly覺得佢奸到出汁,網民笑指佢係「警訊影帝」,不少人大讚劇情幽默,甚至話《警訊》仲好睇過大台節目喎,真係搞到Kelly笑到肚痛。
Kelly Chu