香港人好有人情味，喺屯門安定營業咗三十四年嘅愛群餐廳，今個月二十一號晚就光榮結業啦，好多街坊近來都多去幫襯。Kelly昨日同老闆楊建平傾偈，平叔話同一班夥計感情深厚，○三年爆沙士疫情，餐廳一度資金周轉不靈，全賴夥計借錢畀佢應急。平叔大歎唔捨得班夥計同熟客，但無奈自己到咗退休年齡，仔女又無意接手生意，只好結業，舖頭嘅招牌炆牛腩、絲襪奶茶將成為街坊嘅集體回憶。
愛群餐廳坐落喺領展旗下嘅屯門輕鐵安定站上蓋H.A.N.D.S商場，餐廳租用四個舖位，成二千八百呎咁大，裝修同環境維持三十幾年前嘅風格，好有懷舊味道。今年六十五歲嘅平叔話，餐廳除咗冬至同農曆新年休息幾日之外，幾乎年中無休，佢仲好自豪咁話，最開心有食客讚餐廳「茶靚、麵包靚」。
感謝夥計借錢助渡難關
佢憶述喺○三年沙士之後，生意好差，賣咗兩層樓都唔夠找數，結果有兩位夥計好抵得諗，借咗十幾萬畀佢周轉，仲唔收利息，幫餐廳渡過難關。佢勉勵當下嘅港人唔好輕易放棄，要緊記「堅持就有轉機」喎。
平叔話，咁多年嚟一直掛住打理餐廳，長洲、大嶼山、山頂等都未去過，希望退休後多啲時間行山同去旅行，小妹喺度祝平叔退休周圍去玩，過岸上逍遙嘅生活。
Kelly Chu
;){kind=link}
;){kind=link}
;){kind=link}
;){kind=link}
;){kind=link}
;){kind=link}