Executive日記——中大「百鳥展」迎雞年

  眨吓眼,仲有兩個星期就踏入農曆雞年喇,中文大學文物館為咗應節,舉辦咗個「百鳥迎春:雞年賀歲展」,展出以百鳥為主題嘅文物藏品,小妹要趁呢次好機會去欣賞吓造工精緻嘅文物,仲好好認識一下中國人嘅禽鳥文化!

  中文大學文物館由即日至三月五日舉辦「百鳥迎春:雞年賀歲展」,展出以百鳥為主題嘅文物,時間跨越漢代至今,展品合共五十三組,非常珍貴,當中有書畫及器物等等,Kelly好鍾意青花鴛鴦水注,因為鴛鴦雙雙對對,好鬼sweet!另外,天雞壺造工好精細,形態有氣勢,小妹推介大家去欣賞吓文物,了解不同時代嘅工藝特色之餘,趁雞年認識多啲中國禽鳥文化。此外,唔知大家知唔知,雞係中國十二生肖中唯一嘅禽鳥,中大文物館嘅好朋友話,中國文化傳說,喺百鳥之中,以鳳為首,鳳係傳說嘅大鳥,由於佢形態似雞,有人以雞作為鳳嘅替身,而華人社會一向以雞作為喜樂嘅象徵喎。

Kelly Chu




hd