Executive日記——天壇大佛變飛碟 攝影師惡搞港地標放笑彈

        近年唔少人用改圖表達對時事嘅意見,網上充斥嘅改圖都好負面,幾乎等同惡搞。但Kelly遇到一位外國回流嘅港人攝影師Tommy,佢對改圖偏偏情有獨鍾,善用香港地標同港人生活做題材,誓要用正能量去改圖,博君一笑。

        Tommy十個星期前登陸社交平台,開設名為「surrealhk」嘅帳戶,定期上載誇張、搞笑嘅改圖作品,例如天壇大佛升空、獅子山有獅子等等,本土味十足,短時間已有四千個fans。

  小妹同Tommy傾開,原來佢喺香港土生土長,不過之後離開香港去咗外國二十幾年,到最近回流,發覺香港好唔同,節奏好快好忙,感覺港人好多唔開心,所以佢想透過作品,刺激大家諗下笑下,同時帶出一啲訊息。

  例如一幅水塘同遊艇嘅作品,佢話靈感原來嚟自有人提出喺郊野公園建豪宅,「其實係破壞緊屬於所有人嘅野(環境)」。

  咪睇改圖好似好簡單,原來每幅都花好多心思,例如天壇大佛同ifc作品,各自都花超過十個鐘製作。Tommy就話,其實改圖係一種表達方式,亦係一種藝術,佢好想透過作品令人重新認識改圖。

Kelly Chu

hd