Executive日記——楊利偉料隨團 太空人訪港同小學生對話

  Kelly一直覺得太空人係個偉大而神秘嘅職業,嚟緊香港嘅小朋友有機會同中國嘅太空人真情對話,揭開佢哋神秘嘅面紗,小妹收到可靠情報,太空人當中可能有好耐無訪港嘅楊利偉啊!

  香港各界慶典委員會嚟緊會喺維園舉辦「創科驅動,成就夢想」科技展,佢哋最新消息仲話邀請到幾個中國太空人嚟香港,會喺六月二十九號,搞個「航天英雄與小學生真情對話會」,到時五百個香港小朋友有機會近距離同太空人交流,一問一答咁直接傾計,咁小朋友就可以對太空人有更多了解、對國家航天業嘅發展更加認識啦!小妹仲八到,嚟香港嘅太空人入面,有機會會有中國第一太空人楊利偉!

  呢個科技展除咗會有太空人出現,仲會展出長征一號火箭、天舟一號等實體航天展品,又會有無人機航展表演、羽毛球機械人「對戰」等活動,聽到都覺得好精采好過癮啊!

  有興趣同太空人對話嘅小朋友,只要你係香港嘅小學生,就可以喺二十五號之前去慶委會網站下載活動表格,答啱兩條問題,將資料寄去佢哋電郵,就可以參與抽籤。慶委會會喺二十六號公佈抽籤結果。

Kelly Chu




hd