Executive日記——堅持跑得有Fun 變萬聖節主題 啤酒跑轉型 「嘩鬼」同你跑

        全城街馬原先想搞啤酒跑(Beer run),俾衞生署同醫療團體炮轟,昨日宣佈改變玩法,將喺十月份內全數回水給報咗名嘅參加者,並將活動改為萬聖節跑。Kelly覺得都幾好吖,唔玩「酒鬼跑」變「嘩鬼跑」。

        Kelly問過全城街馬創辦人及行政總裁梁百行改變初衷嘅原因,佢話大會嘅宗旨,係想將有趣嘅元素加入跑步之中,咁先吸引到多啲人參加,但Beer run無咗酒就無fun,run都唔好玩啦,所以諗過其他玩法吸引港人,於是改做萬聖節跑。

  小妹喜愛運動,覺得扮鬼扮馬跑街幾過癮噃。萬聖節跑將會係十月二十九日舉行,地點喺東九龍,有三公里至半馬跑道可以揀,三十人一組喺行人路跑,想組隊就參加「南瓜特工孖住跑」,一家大小或情侶啱晒。由周五開始可以報名,活動設有「最搞鬼扮相大獎」,到時大家記得扮到最驚嚇、最過癮咁跑喇!

Kelly Chu

hd