Executive日記——極端天氣影響健康 中大短片話你知

  近年極端天氣頻現,一時好熱一時好凍,搞到Kelly都好難適應。中大CCOUC災害與人道救援研究所最近就製作咗幾段短片,同大家講吓極端天氣對健康嘅影響,例如溫度好高時,長者嘅求助個案會上升,又原來女性會比男性對高溫更敏感,會更快求助㗎!

  災害與人道救援研究所一直致力研究氣候同健康相關嘅課題,佢哋最近製作咗「熱到爆凍到震健康系列」短片,用輕鬆有趣、簡單易明嘅方法,向公眾介紹佢哋嘅研究結果,同埋提醒大家要重視氣候變化嘅影響。

  其中一段短片「求助篇」話,喺高溫下長者求助個案會增多,但原來唔同性別對高溫嘅反應會唔同,當最高氣溫上升到攝氏三十點五度嘅時候,女性打電話求助嘅數字會開始上升,而男性就要到溫度升到三十三點五度時,先會有較多人求助,小妹覺得呢個發現好有趣呀!

Kelly Chu

hd