Executive日記——VR遊戲試做未來人 浸大新學習館 教可持續生活

  環保意識,要從細開始培養。浸會大學就好有心思,喺校內成立「可持續資源館」(S Gallery),參觀者使用4D多媒體影視、擴增實境(AR)、虛擬實景(VR)等技術,扮演未來地球人,重新學習可持續生活方式,先至可以解決地球污染問題,重新喺地球生活,大家不妨去測試吓自己是否可以環保咁生活。

  「可持續資源館」嘅虛擬故事背景,設定喺二一○○年嘅未來世界,人類因為地球資源過度消耗,要喺漂浮於太空嘅母艦「地球號」上生活,但「地球號」上嘅資源只夠人類消耗一百年,呢個設定真係諗下都覺得迫切。成個故事發生喺四個展區,分別係「穿梭時空」、「探索資源」、「耕出未來」同埋「綠色工作坊」,佔地約二千五百平方呎,每位參加者可以喺展區裏面了解地球資源嘅現況、碳排放等嘅環保概念,更加可以審視自己日常生活中嘅習慣,再加埋最後嘅可持續生活模式體驗!只要通過種種「可持續訓練測試」,就可以返回地球生活啦。

  學習館喺八月尾開始試運,已經吸引逾二千人次參觀,六成人承諾以後會珍惜資源。嚟緊禮拜四會向公眾開放預約啦,大家不妨去體驗下!

Kelly Chu


hd