Executive日記——容海恩呻奶粉貴 叫政府派兩萬蚊津貼

  新民黨立法會議員容海恩早排生咗個B女,臨近母親節,佢噚日就孖埋生咗第二胎嘅黨友、南區區議員陳家珮,抱埋B女齊齊同傳媒茶聚,兩個B女好得意,小妹都想抱下佢哋!

  容海恩嘅囡囡袁昌蔚已經三個月大,人仔細細重七公斤。而陳家珮嘅囡囡就四個月大,小朋友年紀咁相近,兩個媽媽一定成日交流育兒心得啦!佢哋噚日仲交換禮物,陳家珮送玩具琴,琴鍵仲係七彩繽紛,點知容海恩就突然爆咗句「千祈唔好識黃色就得啦,其他都要識」,容海恩就送毛巾回禮。

  兩位媽媽作為政界中人,都趁機發表政見。容海恩大呻奶粉錢貴,希望港府給予一次性、每個嬰兒兩萬元嘅奶粉津貼,而陳家珮就話希望港府加大支援託兒服務咁話!

Kelly Chu


hd