Executive日記——地理位置優越 錄得135品種 沙頭角寶地 孕育靚蝴蝶

  香港石屎森林背後,可以見到綠野,孕育好多美麗嘅蝴蝶。綠色力量公佈最新蝴蝶普查結果,合共記錄咗一百七十八種蝴蝶,發現沙頭角蝴蝶資源居首,有成一百三十幾種咁多,專家相信同沙頭角嘅獨特地理位置有關。另外,大會將於本月十三至十四日喺尖沙咀iSQUARE國際廣場舉行「蝴蝶 x STEM博覽」,有主題展覽同工作坊,Kelly要去探索不一樣嘅蝴蝶世界。

  今年度計劃嘅十二個普查地點中,合共記錄一百七十八種蝴蝶,佔本港蝴蝶物種超過六成半。錄得最多蝴蝶物種嘅普查地點係沙頭角,錄得一百三十五種,沙頭角同時是錄得最多「非常罕見」同「罕見」蝴蝶嘅普查地點,包括屬罕見物種嘅紅珠鳳蝶。

  綠色力量高級環境事務經理單家驊話,沙頭角嘅豐富蝴蝶資源相信與其獨特地理位置有關。當地接壤紅花嶺,而紅花嶺則連接香港八仙嶺同內地保護區梧桐山國家森林公園,大片連貫林地形成生態走廊,連帶附近嘅沙頭角亦有助孕育蝴蝶嘅多樣性。

  另外,大會將於本月十三至十四日喺尖沙咀iSQUARE國際廣場舉行「蝴蝶 x STEM博覽」。大會特別邀請本地著名手作藝團Stickyline喺場內展示以廢紙製作、高約兩米嘅「金裳鳳蝶」大型紙藝作品,市民亦可參與由Stickyline親身指導嘅蝴蝶摺紙手作坊。

Kelly Chu


hd