Executive日記——大館秋季節目好吸睛帶你徜徉藝術海洋

  Kelly行經中環,都去大館走一個圈,返回昔日嘅老香港,緬懷一番,仲可以欣賞到精采嘅演藝節目。大館公佈咗秋季節⽬,重點係大館舞蹈季2019,仲有柏林藝術節,另外兩個全新嘅當代藝術展覽,都叫人好期待。

  大館舞蹈季2019請來多位來自香港、以色列、日本、美國等地嘅知名和獨立表演藝術家,呈獻一系列舞蹈演出,突破表演藝術的形式、界限,探索身份,讓本地觀眾重新審視舞蹈嘅力量和可能性。

  小妹睇過啲舞蹈節目,有來自以色列女舞者演出嘅《如舞在弦》;有由香港獨立二人現代舞團「雙妹嘜舞蹈劇場」(楊惠美及陳敏兒)表演嘅《雙妹嘜:RE》等等。仲有,大館會聯同香港兩大舞團—香港芭蕾舞團和城市當代舞蹈團—攜手帶來一系列豐富的舞蹈電影、互動體驗及演出。

  隨後喺十一月初至月中舉行嘅柏林藝術節,大館與德國駐港總領事館、香港歌德學院及visitBerlin攜手合作,帶來豐富的音樂、舞蹈、電影和藝術體驗。至於兩個當代藝術展覽,其一係「藏木於林」展覽,着眼於當代藝術如何打破傳統框架,讓參觀者欣賞藝術作品嘅深層次創作軌跡。另一個係「幽靈維面—電馭叛客在未來之年」,探討「電馭叛客」(cyberpunk)嘅美學,聽嚟都覺得好有趣。不論你係真文青或偽文青,請上大館網站睇吓有乜精采節目啱你啦!

KellyChu


hd