Executive日記——港健兒精采「第二生命」 世界移植運動會奪佳績 

  天生我才必有用,即使接受器官捐贈,亦一樣可以活得精采。香港一班器官移植運動員就喺英國紐卡素嘅世界移植運動會,一共取得三十四面獎牌,其中係三項游泳同四項賽跑項目仲打破大會紀錄,成為紀錄保持者,為港爭光,Kelly覺得佢哋嘅「第二生命」超勵志。

  今次香港一行六十五人出戰呢個運動會,其中四十二人係移植運動員同一位器官捐贈運動員,仲有醫護同義工同行。佢哋參加咗一百六十九項項目,包括田徑、游泳同球類比賽,共取得三十四面獎牌包括十四金、六銀、十四銅,喺六十個參賽地排名十二。

  港健兒更喺三項游泳同四項賽跑項目中打破大會紀錄。喺祝捷大會獲頒最佳女運動員嘅鍾婉儀,係一名骨髓移植康復者,佢勇奪兩金兩銀一銅,並破了三項大會游泳紀錄,原來少啲毅力都唔得,本身係游泳運動員嘅鍾婉儀話:「移植之後全身肌肉無力,落牀時會感到腳震,約一年半後,先開始跑返步同練返水。」呢幾塊獎牌真係得來不易,Kelly畀個like你!

Kelly Chu


hd