Executive日記——赤灣海洋尋寶團 訪尋本土珍珠養殖場

  秋風來了,天氣漸涼,又係郊遊好時機!生態巴士與漁農自然護理署聯合舉辦「汀角+四季賞2019」活動,當中生態巴士將會分別係下月五日(星期六)、七日(星期一)、十九日(星期六)提供赤灣海洋珍寶探尋導賞活動,等大家了解香港珍珠養殖業歷史,仲有珍珠養殖業在港嘅前景。快啲同Kelly踏上呢趟「秋季之旅」,費用全免!

  呢次赤灣海洋珍寶探尋導賞活動,將帶領大家乘船前往一個名為老虎笏嘅赤門海峽內灣,參觀漁排上的珍珠場,活動內容包括認識香港珍珠養殖業嘅歷史同故事、認識珍珠貝嘅種類,了解珍珠養殖嘅方法同技巧、了解香港珍珠養殖業嘅前景,仲有行業所面對嘅困難同挑戰。

  平時見到鑲係首飾上面嘅珍珠有冇諗過係點嚟?珍珠其實係大海嘅產物,產於貝類動物體內,要養殖珍珠,需要將珠核植入珍珠貝,珍珠貝便會逐漸分泌珍珠層於珠核上,最後形成圓滑嘅珍珠。

  大家或許對珍珠並不陌生,但對其本地養殖業所知卻不多,今次導賞活動一定令你大開眼界。

  Kelly提提大家,十八歲以下參加者需由成人陪同參與,每位成人可帶同最多兩位六歲至十七歲嘅參加者。有興趣嘅朋友快啲登入https://forms.gle/LuRTwVkku3iJEUaU9了解活動詳情同報名。

Kelly Chu


hd