Executive日記——「跳出香港」爆冷大勝 黃婉曼全家拉頭馬樂融融

  近來跑馬,沙田馬場入場人數較少,場面比以往冷清,但昨天就唔同,上演「東方表行沙田錦標賽馬日」,因有多匹「明星賽駒」上陣,吸引多名藝人撐場,星光熠熠,近期少見。嫁作人妻嘅前電視新聞主播黃婉曼,同夫婿有份嘅馬匹仲爆冷勝出,兩人抱埋兩位囡囡影拉頭馬相,幸福感爆棚。

  昨天重頭戲之一,係第八場沙田錦標,屬千六米國際二級賽,郭少明公子郭浩泉名下嘅現任馬王「美麗傳承」擺下擂台,若然贏馬,便完成十一連勝,被熱捧至一點三倍大熱,但賽果令人意外,由黃婉曼同夫婿擔任經理人嘅團體馬「跳出香港」,由華人一哥騎師何澤堯策騎,表現神勇,爆出十七倍冷門奪標。

  賽後,黃婉曼同丈夫帶同兩位小千金,一家四口拉完頭馬再捧盃,樂也融融。馬王「美麗傳承」今仗只跑得第三名,是自從二○一八年四月八日以來首嚐敗績。

  另外,喺第五場賽事,先有陳玉蓮同馬德鐘聯同其他友人合資嘅「快樂實在」奏捷,不過陳玉蓮同馬德鐘無入場,反而見到入場支持朋友嘅胡楓,代拉頭馬,修哥亦響應賽事主題「時尚煲呔賽馬日」,結起煲呔,非常醒目!

Kelly Chu


hd