Executive日記——目標2023年完成 地政測量車密密行 繪全港三維地圖

  唔知大家有無見過地政總署嘅測量車,連日不斷喺街上繞圈呢?原來,測量車裝有車載移動測繪系統,將拍攝到嘅街景化為數據,製作三維數碼地圖,提供更真實準確嘅空間數據!地政總署希望喺二○二三年年底前,完成整個香港三維城市地圖。

  測量車車頂配有一個三百六十度全景攝影相機系統,共有六個鏡頭,解像度達三千萬像素。喺車頂尾部,就裝有三維激光掃描儀,可以將大廈外貌等路面狀況,化為激光點雲數據,並設有全球導航衞星系統接收機同慣性導航系統作定位。至於車尾,就裝上另一套攝影系統,解像度有一千二百萬像素,主要拍攝路面狀況,彌補車頂鏡頭嘅不足。

  地政總署喺今年下半年開始,依照測量車收集嘅數據,先製作三維城市地圖,初步覆蓋港島、九龍,以及新界嘅大埔、沙田、荃灣同屯門等早期發展嘅新市鎮。

  地政總署土地測量師樊杲焜話,三維地圖可以提供更準確、豐富嘅空間數據,更可顯示運輸署拍攝嘅交通影像、天文台錄得嘅溫度、環保署監測嘅空氣污染指數等多項實時數據,幫助分析土地管理、環境評估、交通研究等,亦可以方便巿民查閱資料。Kelly希望,地政總署能夠早啲完成呢個咁有意義嘅項目,繼續發展智慧城市!

Kelly Chu


hd