Executive日記——活化觀塘明渠 勢變港版鴨川河

  香港係一個石屎森林,少見河流,即使某啲地區有,都係以排洪作為主要嘅功能,無乜美化,但將來情況會有變化。渠務署正推行改善工程,一邊提升河道嘅排洪能力,一邊加入綠化元素,美化景觀,其中觀塘敬業街明渠會活化成「翠屏河」。Kelly幻想日後大家就可以好似去日本咁,喺優美嘅河邊活動。

  發展局局長黃偉綸發表網誌,觀塘敬業街明渠將會活化成「翠屏河」,提升排洪能力嘅同時,渠務署會以「易行九龍東」嘅理念,喺河畔建造行人通道、跨河行人通道和園景平台,加強沿河與周邊範圍(包括翠屏河花園)嘅連繫。黃偉綸話,視乎撥款嘅進度,工程最快於二○二○年初展開。

  此外,渠務署工程師葉沛璣介紹活化佐敦谷明渠嘅項目,明渠嘅下游部份及兩旁環境(即佐敦谷公園附近)將進行園境美化,把明渠活化成優美嘅水體,包括喺河道上建造觀景平台,提供休憩空間,讓市民觀賞及進行近水活動;而明渠上游部份環境比較幽靜,考慮加設水池和魚梯等生態環境,以增加生態價值。工程預計亦會喺二○二○年第一季展開。

  Kelly鍾意去日本京都,當地有一條鴨川河,兩岸修建成行人道、單車徑,仲有好多食肆,係日本人嘅休憩地方,亦吸引好多遊客去觀光,希望本港嘅活化河道計劃亦有咁嘅效果啦。

Kelly Chu


hd