Executive日記——樂齡科技博覽提高長者生活質素 機械喵星人 陪伴老友記好窩心

  家有一老如有一寶。隨著本地創科嘅發展,好多公司都有新研發成果,並推出適合長者使用嘅產品,等老友記生活更舒適。由香港科技園公司帶領二十九間園區公司參與嘅「樂齡科技博覽暨高峰會2019」,昨日起一連四日喺會展舉行,展示最新嘅樂齡科技創新方案,其中有機械貓狗,可以倍伴長者,產生慰藉嘅作用。



  「樂齡科技博覽暨高峰會2019」係全港唯一嘅樂齡科技博覽會,由特區政府同社會服務聯會聯合主辦,香港科技園公司協辦,旨在推動創新技術同意念的應用,以提高長者的生活質素。

  Kelly見到唔少產品好得意又有心思,好似由真善美醫護有限公司推出嘅關顧機械貓狗,有內置嘅感應器,會對抱佢哋嘅人作出反應同動作。由於有像真度高嘅毛,長者摸落去好舒服,好似攬住真寵物一樣,而且仲會感覺到心跳㗎!令長者減壓,仲可以借助呢隻高科技寵物,改善同其他人溝通。

  此外,聖雅各福群會膳食同營養師就好有心,為吞嚥或咀嚼困難人士而設計「盛饌」—全港首創嘅預煮家居精緻軟餐,提供優質嘅膳食選擇,擺脫傳統碎餐、糊餐嘅欠佳賣相,重塑膳食嘅色、香、味、營,讓患者重拾進食嘅尊嚴和樂趣,加上簡易嘅備餐方法,有助紓緩照顧者壓力,讓家人與患者有更多具質素的相處時光。Kelly見到展覽中仲有好多醫療用途嘅新產品,全部都好有創意兼有用,值得大家去了解吓。

Kelly Chu


hd