Executive日記——天主教配合客家文化 鹽田梓藝術節 體現中西共融

  大家有無諗過,西方天主教同中方客家文化,可以融洽共存?西貢小島鹽田梓,由即日起至本月二十九日,喺島上舉行鹽田梓藝術節,以「天」為主題,邀請本地藝術家、年輕人同村民共同創作出十七組藝術品,展現當地中西融和嘅一面,以及悠長歷史。

  西貢鹽田梓,有近三百年歷史,全條客家村民,都信奉天主教,所以島上處處融合天主教同客家文化。藝術家黃卓健利用去年颱風「山竹」吹襲期間,島上倒塌嘅大樹,製作《流波‧行雲》海浪形樹木擺設,訴說村民同大自然世代相傳,與風浪搏鬥嘅故事。紮作師傅許嘉雄,亦以竹、蔑、紗紙等,紮出島上聖若瑟小教堂嘅外形,融合中國傳統紮作技藝同西方信仰文化。

  而鹽田梓作為產鹽之地,《鹽光之所》喺藝術節中最具看頭嘅作品之一。《鹽光之所》喺是一間以鹽作為創作媒介嘅實驗室,展出鹽結晶嘅形態記錄,以及一系列關於人同鹽,以至自然關係嘅作品。

Kelly Chu


hd