Executive日記——初心不變 風雨同舟 煲呔伉儷慶金婚 分享相識60載故事

  上月前特首曾蔭權同太太曾鮑笑薇結婚五十年,兩人昨天喺堅道主教座堂舉行金婚紀念感恩祭。煲呔發言時,提到自己與太太識於微時,兩人家庭背景同性格都唔一樣,但走過比普通人更起伏嘅生活,佢希望執子之手,與子偕老咁話。

  呢個金婚感恩祭,煲呔邀請咗一啲好友參加,包括前教育局局長孫明揚、資深大律師張健利等。煲呔長子曾慶衍同胞妹曾璟璇都有出席,而幼子同胞弟曾蔭培夫婦就正在外遊,所以無現身。

  陳志明神父送上一篇經文畀曾氏伉儷,兩人亦切金婚紀念蛋糕,同親友分享。煲呔發言,講到自己同太太相識六十年,結婚五十年,佢好感恩,因為兩人家庭背景、性格都不同,成婚之後,煲呔話自己事事心急,太太就慢條斯理;佢做事全心全意,太太就天馬行空;佢連自己同家人生日都唔記得,太太就連佢父母生死忌都記得起……兩夫妻經歷比平常人有更多起伏,耐不耐鬧交,但每一次係佢向太太講聲對唔住。煲呔希望可以同太太白頭到老,佢仲公開承諾,「初心不變,風雨同舟,抵勵前行」,真係好sweet。

  煲呔仲話,今日會同太太去廈門遊玩。佢亦不忘公眾事務,透露自己他早前到醫院探望被割頸警員同另一頭部受傷嘅警員。

Kelly Chu


hd