Executive日記——已婚督察宿舍 力求保存舊貌 大館保育好認真 為磚頭做Facial

  「大館」舊中區警署建築群,係Kelly鍾意去閒逛嘅活化古蹟,好期望喺三年前倒塌嘅已婚督察宿舍大樓,快啲復修好,早日開放,屆時小妹又有多啲活動空間。據負責呢項工程嘅建築師話,已婚督察大樓嘅結構好唔穩固,佢要去英國尋找當年嘅磚塊,仲訓練工人以做Facial嘅蒸氣方式造磚,務求採用原有物料,而設計仲要舊中有新,加上鞏固結構,工程艱巨,估計要花三年時間先至竣工。

  參與「大館」保育工作達八年之久嘅建築師李文亮(Kenneth),帶Kelly同傳媒朋友深入已婚督察宿舍大樓,事前戴晒頭盔,入去見到好多鋼支架,支撐整座大樓。Kenneth話,施工時有咁多支架,大大增加難度。另外,佢仲發現呢座有百多年歷史嘅青磚建築,物料同手工都好差,青磚應該好結實,點知佢發現好多有裂痕,可能質素有問題。仲有用來黏合啲泥漿,用手指刮就散晒,出現一個個小洞,奇怪嘅係,牆身嘅窿,竟然被以前嘅工人胡亂放入紅磚、木頭,甚至雜物都有,咁又點會穩陣呢。

  Kenneth話,宿舍內嘅木橫樑出現裂痕,未來要加鋼架加固,支撐屋頂嘅三角形結構亦唔啱規格,所以要重造,以符合最新嘅防風規則。物料方面,佢務求採用當年嘅一磚一瓦,搵到去英國嘅磚廠,由當地工人教本地人員重造當年嘅紅磚,仲出動噴蒸氣機,好似做Facial咁保持磚頭嘅適當混度,用心良苦。

  設計方面,會保留一部份舊貌,同時建新翼,兩者和諧地配合,畀人見到歷史一面,也感受到建築團隊加入嘅新意,如磚牆嘅新立體結構,即佢所講嘅Adaptation Plan(調適計劃,即既有重建但又重視保育),預計呢個調適工程至少要三年時間先完成,Kenneth,加油呀!

  馬會慈善及社區事務執行總監張亮話,大館已完成保育活化嘅十多座建築物,動用咗三十八億元,佢形容工程展現香港嘅歷史。令人開心嘅係,今年大館項目獲聯合國教科文組織頒發遺產保護卓越獎項,係香港人嘅光榮。

Kelly Chu


hd