Executive日記——民政事務局免費派年曆 溫馨插畫向市民傳遞暖意

  二○二○年就嚟到,唔知大家有咩大計呢?民政事務局同公民教育委員會,邀請咗本地插畫師文地貓,以「尊重與包容」、「負責」及「關愛」為題,創作新一年嘅年曆,尋日仲喺全港民政諮詢中心、公共圖書館等地方免費派發。Kelly都去咗排隊攞年曆,見到一早已經打晒蛇餅,大受歡迎。

  Kelly一打開年曆,就見文地貓同佢幾隻愛貓,既溫馨,又充滿想像力嘅生活點滴。局方就話,年曆以親切、幽默嘅手法,表達委員會三個核心價值,分別喺「尊重與包容」、「負責」及「關愛」。年曆每月嘅主題插畫都有所不同,並附有以相關核心價值所訂立嘅每月一行動,鼓勵大家一齊實踐目標,履行公民責任,共建關愛共融嘅快樂社會。局方希望,每次翻開新一頁年曆,除咗可以感受到濃濃暖意,亦會為嘴角添上笑意。

  Kelly提提大家,年曆設有網上版,若大家錯過尋日免費派發嘅機會,可以於委員會網頁下載年曆卡,以及座枱年曆。

Kelly Chu


hd