Executive日記——新城市欄杆鐵網陣 勁似高度設防監獄

  反修例風波,部份商場受到破壞,近日暴力示威稍退,有關商場即刻大復修,其中沙田新城市廣場就加固防禦設施,保護啲玻璃欄杆,點知有網民就好搞笑咁話,乜咁似高度設防嘅監獄!

  有網民拍低新加裝嘅欄杆,係好重型嘅鐵網陣,唔單止由好粗嘅鋼條組成,仲鋪上鐵絲網,真係點樣用大鐵錘都打唔爛。最特別嘅設計,係網部仲設有一個斜嘅網罩,想攀爬都幾困難,如果想跨越,就非常之高難度啦。

  其實,Kelly最近行商場或出街,都見到好多曾被破壞嘅銀行、便利店、食肆等,紛紛在店門外加建大塊防火膠板,抵禦衝擊,但照常營業,可見香港零售業真係靈活變通,能屈能伸,面對逆境,依然自強不息。

Kelly Chu


hd