Executive日記——泵房水缸20年冇洗過積滿厚厚污泥嚇親街坊

  除咗大廈水缸應定期清潔外,泵房入水水缸嘅衛生亦應受重視。有大廈業主立案法團近日,清洗大廈近二十年未清洗過嘅泵房入水水缸,發現裏面滿佈污泥一樣嘅厚厚污垢,更導致大渠淤塞,最後要由水務署派員嚟處理。Kelly見到貼文都嚇親,擔心自己居住嘅大廈會唔會出現同一情況。

  西環均益大廈二期業主立案法團,近日喺facebook專頁「均益二期維修關注組」指,近日進行洗食水缸工作,一併清洗處理近二十年未清洗過嘅泵房入水水缸,發現裏面滿佈污泥一樣嘅厚厚污垢,最後洗出一桶「泥水」,污泥更導致大渠淤塞,總掣亦因長年無開關而一「郁」就爛,最後要由水務署派員嚟處理。關注組又話,沖出來的泥太多,致大渠塞了,「你諗下等於二十幾年唔沖涼,沖出嚟D泥多到連大渠都塞埋!」貼文引起居民關注,不少人被嚇窒,指太恐怖,憂長久以來飲用了「污水」,更有人留言指「似屎渠多過水缸」。

  Kelly查過,根據水務署《食水系統維修指引》,一般而言,地下同天台儲水箱應至少每三個月清洗一次,必要時需要更頻密清洗。希望各大廈業主立案法團或管理處都關心一下啦!

Kelly Chu


hd