Executive日記——消委會提供報告俾公眾參考 慎選口罩潔手液 為防疫做好準備

  本港正處於流感高峰期,加上武漢發現新型冠狀病毒引發肺炎爆發,Kelly都買定口罩、消毒潔手液等,保持個人同環境衛生。消委會近日特意喺官網提供三篇有關口罩、搓手液同濕巾,以及洗手液嘅選擇月刊報告,畀大家免費下載參考,做好防疫準備!

  細菌過濾效果係評估外科口罩保護能力嘅重要指標。消委會曾喺市面搜集咗二十九款口罩作測試,發現大部份型號嘅細菌過濾效果都高於九成五,整體表現良好。其中,「Elleair」超強阻隔PM2.5成人口罩(標準)、「麥迪康Medicom Safe+」SPSHMK2585彩色生活口罩耳掛式,以及「理的Ultra Ready」外科手術口罩,細菌過濾效果更高達百分之九十九點九。

  消毒搓手液同濕巾方面,按世衞意見,六至八成濃度酒精溶液最有效殺菌,太濃反而適得其反,而酒精嘅消毒效果沒有持續性,對殺滅寄生蟲或細菌孢子嘅效用不大。

  消委會檢測咗三十五款一般同抗菌洗手液,發現三款偏鹼性嘅一般洗手液,可殺滅百分之九十九點五或以上金黃葡萄球菌同大腸桿菌。抗菌洗手液喺殺滅大腸桿菌表現參差,當中三款殺菌率低於四成一,殺滅金黃葡萄球菌嘅表現則較為理想。

  消委會又喺部份洗手液中,檢出可致敏防腐劑CMIT或MIT,另有樣本驗出游離甲醛及抗菌劑PCMX,可令使用者產生皮膚過敏反應。會方又提醒,抗菌洗手液只為消費者帶來極有限嘅額外健康好處,過度使用抗菌劑反助長抗藥性細菌出現。

Kelly Chu


hd