Executive日記——工人趕工 力爭16號重開 又一城變裝 加建鋼鐵城門

  九龍塘區內唯一大型商場又一城,遭受激進示威者破壞,關閉咗兩個幾月,好多街坊都期待商場早啲重開,令日常購物或生活方便啲。居於又一城附近嘅朋友昨日見到,好多工人正在趕工,喺商場外圍建造用鋼鐵做嘅城門,盛傳商場最快可以喺本月十六日重開。

  Kelly嘅朋友報料,話昨天係周日,好多工友仍勤力趕工。由於又一城內外都被激進示威者嚴重破壞,好多玻璃被打碎,現在四面圍封起來,工人就用鐵板喺外圍建造一個個城門狀嘅出入口。詭秘嘅係,以前商場有一個出入口好近生產力促進局,好多人經過呢個出入口往港鐵站,但現在就被鐵板圍成一個圓桶咁,唔見有城門出入口,係唔係密封咗,大家以後要從其他出入口通往港鐵,或者日後再通番,現在就唔清楚。

  朋友話,從外面睇入去商場,仲有好多工程進行中,尤其條樓梯打到爛晒,能否趕及月中重開呢?至於其他樓層嘅地面就見到鋪番好。有工人就話,努力趕工中,仲話收到指示要喺本月十六日重開商場咁話。一位外籍人士對小妹朋友話,工人仲整緊,商場能否如傳言中嘅日子重開,令人幾懷疑,但佢就呼籲激進示威者要畀啲尊重其他人。Kelly都認為,大家要顧及人家生活需要先啱。

Kelly Chu


hd