Executive日記——多款好意頭年花供轉運 東港城新春花展 搶先睇罕見蝴蝶蘭

  農曆鼠年快到,又係欣賞年花嘅時候,鍾意年花嘅朋友,Kelly介紹去東港城嘅「金鼠呈祥賀庚子」新春花展會,由即日起至一月二十四日,香港蘭花大王會推介罕見嘅蝴蝶蘭「黃鑽」,仲可以欣賞到香港年花大王嘅新款盆滿鉢滿年花禮籃。

  東港城今年繼續同香港蘭花大王、千葉園始創人楊小龍,以及香港年花大王、香港鮮花盆栽批發商會主席賴榮春合作,呈獻「金鼠呈祥賀庚子」新春花展會。楊小龍同新一代蘭花才子楊尹俊喺今年花市首推十款新款應節蘭花,包括罕見淺黃色嘅蝴蝶蘭「黃鑽」、比手機屏幕更大嘅「殿堂級恩桃」同有玉玲瓏之稱嘅「櫻桃公主」等,真係好靚,啱晒Kelly同愛花之人。

  年花大王賴榮春亦為市民嚴選多款好意頭嘅年花,等大家新年轉運,並推介四款年花禮籃,送上盆滿鉢滿的祝福。今年新春展會仲有新玩意,舉行年花拍賣,畀大家搶拍精美蘭花及大師設計嘅花藝作品,氣氛必定好熱鬧。福氣滿載嘅精美盆栽將以低至$188起超筍價供The Point by SHKP會員搶拍,另外多款期間限定價值逾三千元嘅精美盆栽亦以抵價拍賣。

  另外,係一月十八日,為迎接庚子年,楊小龍為The Point by SHKP會員獨家精心安排共五十株八蚊開運花「金鼠迎春」,亦會喺東港城開賣。

Kelly Chu


hd