Executive日記——東蓮覺苑頌經會齊齊為香港祈福

  香港經歷大半年嘅風風雨雨,好快又到農曆鼠年,Kelly同好多朋友一樣,誠心希望送舊迎新,鼠年會更美好。朋友話,唔好得個講字噃,於是拉小妹去跑馬地嘅東蓮覺苑,參加一場名為「欣求和樂」嘅頌經會,一齊祈求香港喺新一年欣喜和樂。

  呢個頌經會喺周日舉行,以「音聲佛事︰鳴法鼓,散妙花,覺梵唄,念佛石」,展現諸佛菩薩慈悲嘅莊嚴,讓參與者得以安住,一起共譜慈悲慈願嘅禪音,從而啟動社會對大眾和樂嘅祝福,共成和樂淨土。小妹安坐其中,聽了禪音,身心頓感平靜、安詳。衍空法師、僧徹法師、聖傑法師、衍璇法師同傳燈法師到來開示。衍空法師話,社會發生嘅事,好多人感到無力改變,於是唔開心,但並非乜嘢都做唔到。佢話,最重要係大家從心出發,心想就有行動,每人行一步,促使社會改變。小妹受到頓悟,新一年用心去謀求改變。

  講番東蓮覺苑,已有近九十年歷史,係香港島首間佛教寺院,被列為法定古跡。小妹覺得寺嘅築建好特別,採用當時流行嘅中國文藝復興建築風格,以西方技術建造中式嘅外觀,地面鋪砌意大利進口地磚,又有西洋彩繪玻璃,室內裝飾亦中亦西。

  最特別嘅係,寺嘅形狀似一艘船,由於依山而建,船尾向山下,船頭向山上,如逆水行舟,有勉勵人們向上嘅意思。

Kelly Chu


hd