Executive日記——漁護署呼籲唔好餵食 220磅野豬堅尼地城出沒

  本港野豬不時都誤闖市區「覓食」。有街坊同Kelly講,噚日中午時分,就有一隻野豬喺西環堅尼地城加多近街臨時公園出沒。野豬只喺草叢附近覓食行走,未有亂衝亂撞,引起唔少街坊圍觀,紛紛舉機拍照。一般嚟講,野豬習慣避開人類,一旦被挑釁或者受驚嚇,可能會作出攻擊行為,大家應避免餵飼野生動物,減低野豬到市區覓食嘅習慣。

  漁農自然護理署就話,噚日西環出沒嘅野豬長一點五米,重一百公斤(約二百二十磅),署方接通知到場後,將野豬麻醉,檢查後已將佢野放。根據漁農署資料,近年野豬喺民居附近出沒的情況有上升趨勢。原來,人類餵飼嘅食物,同處理不當嘅戶外垃圾,都為野豬提供咗豐富嘅食物來源,吸引野豬到市區同民居附近生活。當野豬習慣到市區同垃圾站搵食,會為附近居民帶來滋擾,並引起環境衛生問題。野豬喺市區覓食時,亦有機會遇到交通意外。同時,當野豬數目違反自然地增加,會過度消耗天然資源,可能會影響生態平衡。

花生友齊齊舉機

  漁農署指出,要減少野豬喺民居附近出沒,最有效嘅方法就喺清除食物來源,因為市民嘅餵飼活動,會令野生動物誤以為市區有穩定嘅食物供應。小妹都呼籲大家,唔好餵飼野生動物,免得影響環境衛生同生態平衡!

Kelly Chu


hd