Executive日記——精美小冊子 圖文並茂 旅發局推介行山樂 東涌線13公里親近大自然

  依家嘅冬天,不冷不熱,最啱行山。旅發局新出咗一本新小冊子《香港郊野全接觸 登山遠足‧單車旅遊指南 2019-2020》,推介多條行山徑,局方唔止齋推介,仲身體力行,約埋Kelly同一班好友,由東涌行四小時去大澳。

  旅發局朋友帶隊,一行人一早由東涌出發,行無耐就到咗侯王宮,見到有人燃點成棵樹咁高嘅大香還神,大家入內參拜之後,沿東涌古道上山,雖然名為古道,但修築咗紅毛泥行山徑,所以行得幾舒服,中途喺沙螺灣見到一個名為「千里眼」嘅大型藝術裝置,大家不停開心打卡,跟進繼續上路,沿途可以飽覽港珠澳大橋美景,去到末段係石路,比較難行,但可以鍛煉身體,出一身汗,人都舒服晒。行咗四個多小時共十三公里,終於到達水鄉大澳,享受一頓漁村美食,為行程帶來完美嘅句號。

《香港郊野全接觸 登山遠足‧單車旅遊指南 2019-2020》推介多條行山徑,分類為「地質奇景」、「壯麗美景」、「回歸自然」、「日落魔力」、「漁村生活」同「騎行樂趣」,梗有一條啱行山愛好者心水。

  旅發局話,佢哋請來National Geographic雜誌嘅得獎攝影師,走遍香港,拍下不同主題嘅行山徑美景,吸引旅客來港,親近大自然。

  大家都攞本小冊子睇吓,去行下山,紓減吓生活嘅壓力。

Kelly Chu


hd