Executive日記——蔡康年亂入 「人疊人」直播 嚇窒女主持

  Kelly不時都睇下TVB嘅財經節目,了解市況,點知昨早節目就出現「人疊人」嘅搞笑場面。女主持丘紫薇訪問勤豐證券資產管理董事總經理連敬涵時,蔡康年嘅畫面突然入鏡,望落好似喺連敬涵面前坐低,事出突然,直播即時轉鏡頭,丘紫薇一度被蔡康年「插入」畫面嚇窒,即時手指指,疑通知攝影師留意,其後尷尬微笑望向鏡頭。片段喺網上瘋傳,唔少網民笑言,蔡康年遮蔽連敬涵一幕,如「人疊人」,亦有人指「女主持人忍笑忍得好辛苦」。

  據悉,當時蔡康年喺另一個廠準備主持節目,疑訊號出現錯誤,令佢嘅畫面「插入」咗財經直播節目中。事後蔡康年話,多得入行時有前輩教落,喺攝影機前,無論有無開機,都要注意言行,今時今日,果然有用!

Kelly Chu


hd