Executive日記——提供緊急生活援助金 嗇色園百萬基金 為肺炎港人送暖

  疫情下,部份確診病人同家人,可能面對經濟困難,急須援手。嗇色園好有心,宣佈成立緊急援助基金,並撥款一百萬設立「新型冠狀病毒確診個案緊急生活援助金」,以最簡單直接、快捷嘅方法,向非領取綜援而有確診病人嘅家庭,提供即時、短期嘅緊急生活援助。

  嗇色園對Kelly介紹呢項援助金嘅申請資格,申請人必須係香港居民,喺本年一月至六月確診感染新冠肺炎,家庭收入因而受影響,並非申領綜援人士,而申請人嘅家庭資產總額不高於綜援申請者嘅資產限額。

  每個成功申請個案可獲發一個月生活援助,每名家庭成員可獲二千五百元,或實際減少之收入,兩者以較低金額為準,每個個案可獲發最多兩萬元援助金。

  符合資格而有需要者,可透過各醫院醫務社工或綜合家庭服務中心社工轉介,將填妥之申請表連同有關證明文件副本交回嗇色園黃大仙祠「嗇色園緊急援助基金」小組審批,最快兩個工作天內即可完成審批。真係人間有愛,如有需要,可致電22774688查詢。

Kelly Chu


hd