Executive日記——過 「羅致光式」 生活 黃建業搭(車立)先戴口罩

  勞工及福利局局長羅致光喺上星期發表網誌,笑言自己二十二日以嚟,無去過人多嘅地方,又無搭過公共交通工具,「一片口罩都無用過,間接慳了給有需要用口罩的人」,成為街頭巷尾嘅話題。Kelly嘅姊妹昨日就喺馬會會所撞倒美聯物業集團主席黃建業,交談之後,發現佢最近都係過緊「羅致光式」嘅生活,佢話自己常以私家車代步,返到辦公室又得自己一個,所以用到口罩嘅機會極低咁話。

  黃建業話,唯一需要戴口罩嘅時候,就係搭(車立)嘅時候。雖然佢個人嘅口罩用量低,但公司嘅前線員工都要接觸客戶,所以需要口罩用,佢個囡囡靜怡就幫手,四出撲口罩,仲去到埃及先撲到八萬個口罩返嚟。

  黃建業認為,大家抗疫期間,千祈唔好掉以輕心,但亦都唔需要太反應過度,搞到自己嚇自己就唔好喇。

  一講到生意話題,佢形容依家仲「濕滯」過「沙士」嗰陣,起碼「沙士」嗰陣經營成本低,而生意係慢慢下跌,目前嘅經營成本仍然處於極高嘅水平,但生意就係「斷崖式」咁下插,佢仲估計失業率仍未見頂,會繼續飆升。

Kelly Chu


hd