Executive日記——惠康設特定購物時段 長者孕婦等可優先埋單

  喺新冠肺炎疫情期間,多咗市民留喺家中,對食物同日用品嘅需求比平日多咗。為咗方便有需要嘅人,惠康同旗下特色超市,包括Jasons Food & Living、Market Place by Jasons、3hreesixty、Oliver’s the Delicatessen等超過三百間分店,由下周三起,會為六十五歲或以上嘅長者、孕婦同殘疾人士,安排特定嘅購物時段,方便佢哋購物。

  特定購物時段會係營業時間開始,直至朝早九點。受惠社群到時去惠康或旗下特色超市買嘢,可以優先埋單,同時店員會為佢哋提供特別協助,例如拿放喺貨架高層嘅貨物,如果太重,仲會幫手搬到收銀台等。

  惠康話,呢個安排暫定會到四月三十號,到時會檢視情況,考慮要唔要延長。同一期間,其他市民可以照常購物,但見到有需要嘅人,都可以伸出援手。

Kelly Chu


hd