Executive日記——疑似粗口 回應:多學設計免中伏 陸醫生 「心心呔」 內藏乾坤

  潮流服飾設計,真係一門好高深嘅學問,Kelly有時配搭錯誤,畀人投以奇異嘅眼光。港島東醫院聯網總監陸志聰醫生昨日就面對呢個問題,佢喺講解醫管局計劃啟用四百張第二線隔離病牀嘅時候,領呔上個心形圖案成為網民嘅焦點,原來係由英文粗口設計而成。陸醫生經醫管局回覆傳媒話,會學多啲圖案設計知識咁話喎。

  陸志聰醫生戴上嘅領呔,深藍底色,印上由白色條紋組成嘅心型花紋,不過有眼利嘅人睇出,個心心圖案別有心思,其實係由英文粗口「Fxxk you」扭曲組成!網上亦有印上鄰似字樣嘅領呔出售,仲好好賣O添,因為已經賣晒。

  一條領呔引來網民同傳媒嘅關注,真係始料不及,陸醫生就透過醫管局發言人回應話:「會學多啲圖案設計嘅知識,唔好再中伏!」睇嚟小妹都要一齊學多啲服飾設計嘅知識先得,以免中伏。

Kelly Chu


hd