Executive日記——願望成真基金送上「電子祝福」 藝人拍片打氣 為病童放天燈

        疫情下,Kelly特別掛念兒童醫院嘅小朋友。願望成真基金話,疫情下,義工探病活動要暫停,但基金利用資訊科技,請一眾藝人拍片,為小朋友打氣,真係好有心。基金仲用虛擬實景(VR)技術,燃放天燈,以視像感受,圓一名病童嘅願望,好感人。

        疫情由一月底發生,醫院禁止家屬以外嘅人探病,令基金嘅探病活動暫停。為咗令小朋友維持開心、樂觀嘅抗病心理,基金請咗一批藝人包括鍾嘉欣、森美、欣怡、陳柏宇等拍片,為病童送上「電子打氣」,大家隔空鼓勵小朋友多笑、想開心事、保持希望。基金仲會上載手工教學同音樂治療嘅短片,畀小朋友做手工同唱唱跳跳。

  基金發言人同Kelly講,實現病童願望嘅工作,只係暫緩而無停過,現在先處理想要禮物或者唔需要太多接觸嘅願望,同比較緊急嘅個案。好似一名小朋友想去台灣放天燈,疫情下無法成行,基金就同理工合作,用VR技術畀佢體驗去台灣放天燈嘅感覺。

  另外,基金為四百幾個願望家庭寄送咗防疫物資,包括成人同小童口罩及心意卡。服務咁有愛,抵基金攞咗《東周刊》今年香港服務大獎嘅慈善機構大獎。

Kelly Chu


hd