Executive日記——早期門票印殺人鯨躍起  海洋公園舊物 喚醒港人回憶

  海洋公園財困,等候港府向立法會申請五十四億元支援繼續營運。唔少朋友話,海洋公園係港人集體回憶,小妹一樣,細細個小學旅行,就係去海洋公園。專門收藏香港舊物嘅Mido,就傳來海洋公園早年嘅門票,見到條殺人鯨躍起,童年美好回憶返晒嚟。

  位於上環東街嘅Select 18,係香港舊物迷嘅聖地,嗰度收集咗各個年代嘅香港尋常物品,到o依家已經係歷史嘅見證品。好似海洋公園面對倒閉危機,好多人就想搵番嘅海洋公園舊物,喺Select 18竟然都有。Mido話,佢就收藏咗早年海洋公園嘅明信片,一套十張,睇番好有味道,包括有消失咗嘅正門,同埋躍起嘅殺人鯨,當年仲有袋鼠。Mido仲話,佢收埋一封信,係海洋公園開館初期嘅團遊申請信,好有紀念價值。

  海洋公園係香港人嘅集體回憶,大小朋友嘅遊玩好去處,當年荔園結業令小妹都幾傷心,希望海洋公園捱過呢個難關啦。

Kelly Chu


hd