Executive日記——旅發局推廣本土遊 全新角度探索香港美

  疫情下,大家無得外遊,預計未來一、兩個月都好難出行,連旅發局都話,疫情對全球嘅旅遊業帶來重大打擊,估計要較長時間先完全回復以前水平,咁點算,局方就為大家準備去探索香港之美,料六月中推出「旅遊.就在香港」計劃,除咗玩本土遊,仲有一萬一千個涵蓋餐飲、零售、酒店、旅行社同景點等嘅優惠,等大家玩得更開心。

  旅發局總幹程鼎一同企業事務總經理梁美寶昨天介紹推動旅遊業復甦嘅三部曲:先鼓勵本地遊,再透過「旅遊氣泡」,與疫情受控嘅旅遊目的地互相建立有限度旅遊,最後全面恢復國際旅遊。

  最快同預料喺下個月中先行嘅,係推出「旅遊.就在香港」計劃,鼓勵香港人在港旅遊,以全新角度探索香港。呢個計劃有三大重點:一,係深度遊攻略:以六大主題,包括天際線(維港景色)、美食、本地文化、健康、夜生活及購物,製作深度遊攻略,畀港人以全新角度探索香港,當中搜羅鮮為人知嘅景點及新奇活動,如大埔森林浴及大美督划皮艇等;二係Kelly最like嘅全城優惠,網羅坊間嘅優惠,並上載至一站式食、買、玩優惠平台,方便大家使用,預計將有超過一萬一千個涵蓋餐飲、零售、酒店、旅行社及景點等嘅優惠,小妹好期待。三係賞你遊香港,市民先消費,再換取地道遊,詳情稍後公布。大家準備好,深入認識我哋呢個美麗嘅家園啦。

Kelly Chu


hd