Executive日記——忌廉哥走了!貓奴永遠懷念

  昨天係萬千貓奴傷心嘅一天,忌廉哥走了。主人高先生喺網上公佈,忌廉哥抗癌九個多月,喺昨天早上十一時半喺媽咪高太懷中安詳地去咗彩虹橋,高先生話,忌廉哥係獨一無二、無可取代嘅,所以唔會搵第二個取代佢喺貓奴心目中嘅位置。

  昨天高先生係fb公佈︰「再見了,我們親愛的忌廉……忌廉今日開心的去到彩虹橋,去探望牠的好朋友們~忌廉的離開只是在另一國度去守護着大家,忌廉家族會延續你的使命,繼續宣揚你的正能量~忌廉你永遠都會活在我們心中,讓這份愛可以繼續延續下去,願你一路好走……」Kelly見到呢段文字都眼濕濕。

  高先生對Kelly話,忌廉哥喺去年九月患上胃癌,佢同太太用盡方法去醫佢,包括西醫和中醫,仲為佢安排化療,可惜佢昨天早上喺媽咪懷中嘔吐同瀨咗屎之後就離去,高先生好傷心。

  忌廉哥嘅粉絲聞訊後,好多人趕去喺油麻地彌敦道康樂大廈一樓嘅「忌廉哥與忌廉哥家族」,瞻養佢嘅遺容,佢嘅遺體喺昨天四點幾由動物善終專家嚟接走去。高先生話,暫時仲未知葬禮安排,一切聽專家意見。

  忌廉哥係英國短毛貓,享貓年十四歲幾,早年喺尖東嘅報紙檔吸引好多人為佢拍照,佢善解人意,成為貓界紅人,其後仲成為廣告商嘅寵兒,又出席好多宣傳活動,係貓界KOL。公關界名人Tim Lau哥知道忌廉哥去世,佢本身都係一個貓奴,所以好傷感,佢喺fb發文悼念︰「再見啦 尖東忌廉哥,還記得當年找你做尖東倒數活動大使,一齊倒數發放正能量,奴才非常榮幸,請大家珍惜同貓相處………」

  高先生話,忌廉哥成為明星貓,係自然發生嘅事,佢完全無經營,好似人類一樣,只要本身有才華,就可以成名,忌廉哥就係咁,忌廉哥嘅地位,係無可取代嘅,佢亦唔打算捧第二隻貓代替佢。

Kelly Chu


hd