Executive日記——駐武漢主任馮浩賢 感謝太太遙距支持

  武漢爆疫,封城前一刻選擇留下嘅駐武漢經濟貿易辦事處主任馮浩賢(Vincent),由一月二十三日起留喺當地到上月中先返香港,昨日佢上港台講述留專疫區協助港人嘅經歷,喺採訪中分享咗好多封城期間嘅「見招拆招」經驗,仲多謝喺香港遙遠支持佢嘅太太,送咗首歌畀佢,首歌叫Vincent,好閃!

  小妹聽Vincent講,佢喺一月二十三日凌晨四點收到武漢將要封城嘅消息,佢有六個鐘離開,加上佢當日原定坐飛機回港過年,但佢選擇咗留喺武漢建緊急指揮部,支援喺當地嘅港人。佢話,太太無畀壓力佢,令佢好放心喺前線工作。Vincent話封城後最難忘嘅事,係人手不足,所以感到工作永遠都做唔完,連應有假期都貢獻畀政府,仲話畀自己聽唔可以倒下,因為唔會有人可以代替,佢與同事嘅關係好似兄弟咁,大家好團結互助,平衡各人物資上嘅缺少。問佢真係無餓過一餐?Vincent話冇,唔係講究都會食得飽,其他物資慳住都夠用。

  最難忘嘅個案,係一家六口回武漢探親,無想過父母喺當地染疫,父親病瘉但妻子去世,兒子與經貿辦協商,暫時不公佈母親去世嘅消息,令病瘉後單獨隔離中嘅父親返家先公佈,以免父親單獨一人時會諗埋一邊。

  Vincent五月底會返武漢繼續工作。有人稱佢係「香港英雄」,佢話唔敢當,佢只係想盡量幫港人,幫得幾多得幾多,應該做嘅就去做。最後,佢多謝佢一直喺香港支持佢嘅太太,送咗首歌畀佢,並向太太話「多謝你」!

Kelly Chu


hd