Executive日記——會展疫後恢復展覽 準新人甜蜜揀婚紗

  疫情自今年一月底發生之後,好多行業停頓,好似會展業就喺二月起停運,喺三月同四月灣仔會議展覽中心一直無活動,直至近日疫情穩定咗,灣仔會展中心終於喺上周五迎來疫情爆發之後嘅第一個展覽活動,仲係好sweet嘅第九十八屆香港結婚節暨春日婚紗展,展期三天,為準新人提供婚嫁產品、婚禮和婚宴資訊及服務,應有盡有。

  會展中心朋友話畀Kelly聽,呢個結婚節暨春日婚紗展原本喺二月中旬情人節期間舉行,點知受疫情影響,一拖成三個月,會展上下都好重視,特別加派人手清潔消毒,等入場人士安心,而參展商亦派出機械人在會場內遊走,噴灑消毒劑,喺大家同心協力下,提高公共衞生,做到萬無一失。

  Kelly見到入場男女試婚紗或選擇結婚用品,個心都好甜,希望會展業慢慢恢復運作,帶畀大家更多參展活動,等生活更多姿采就好。

  會展管理公司團隊已加強衛生措施,為參展商和入場觀眾提供舒適衛生的環境,亦為未來各項大小活動重臨會展中心作好準備。

Kelly Chu


hd