Executive日記——為復康會拍短片談「通波仔」經歷 阿Bob同太太發誓 聽話食藥努力護心 

  Kelly好着重身體健康,畢竟健康係打拼嘅資本。近日香港藝人林盛斌(阿Bob)以「通波仔」過來人嘅身份,喺香港復康會拍攝短片中大談心路歷程。由佢唔重視血管有塞嘅問題,到接受手術後被女兒感動,洗心革面向太太發誓要努力護心,仲好聽醫生話,服用雙抗血小板藥物預防復發。

  阿Bob大爆兩年前佢三條血管都有塞嘅情況,緊急即晚入院「通波仔」。佢話佢當時只係覺得「心口翳住翳住,好似畀重嘢壓著,呼吸有啲困難,膊頭、背脊甚至牙骹都痹到痛!」醫生話,阿Bob好好彩,研究指有近七成嘅四十五歲患者,發病前都無典型胸痛症狀。

  Bob透露,當時太太為了三個囡囡較鎮定,但佢就喺術前就「驚自己有事,驚三個細路無人照顧,驚有乜事老婆一個人搞唔搞得掂⋯⋯」而三個囡囡都好擔心,不過大囡喺佢手術後就提醒其他妹妹唔好打擾佢靜養,令Bob聽到有啲眼濕濕,覺得「佢地大個了。」

  之後Bob對太太發誓要努力護心。最近醫學界更新咗指引,建議服用雙抗血小板藥物預防復發的時間由一年延至四年,Bob都話「醫生話食幾耐就食幾耐」。此外佢仲「捉埋」太太一齊參加香港復康會社區復康網絡舉辦嘅心臟復康訓練,減低心臟病惡化或復發風險。

Kelly Chu


hd