Executive日記——昂坪360夥拍小童群益會 送出逾萬張門票 分享抗疫故事 贏纜車門票擁抱大自然

  昂坪360纜車上個禮拜三重開啦,Kelly約好朋友,稍後一齊去登山,呼吸新鮮空氣。屋企有十一歲或以下小朋友嘅家長留意啦,快叫佢哋分享抗疫嘅故事,就有機會得到兩張免費纜車門票,去昂坪擁抱陽光,舒展身心。免費車票有逾一萬張咁多,免費遊昂坪不是夢。

  疫情期間,好多小朋友留喺屋企防疫同學習,為咗俾佢哋喺疫情穩定之後,到戶外享受大自然嘅風光,舒展下身心,昂坪360夥拍小童群益會,聯合舉辦「擁抱驕陽」抗疫故事分享活動,一共送出逾一萬張纜車票。

港人享門票半價優惠

  由即日起至六月五日,十一歲或以下嘅小朋友可以透過文字、相片、或繪畫,分享留家抗疫嘅一件有意義事件,連同姓名、出生年份及身份證頭三個數字,傳送至小童群益會指定電郵信箱[email protected],其中五千名參加者會獲選,每人得一張小童來回車票和一張成人來回車票,喺七月至十二月嘅指定日子使用,更可以捐款形式額外買多兩張纜車門票,每張建議捐五十元,收益全數撥捐小童群益會,用作協助基層家庭嘅兒童,俾佢哋參加天賦及潛能發展課程。

  另外,為鼓勵大家親親大自然,昂坪纜車推出港人尊享昂坪纜車門票半價優惠。即日起至七月三十一日逢周一至周五(公眾假期除外),每名香港居民只需出示香港身份證明文件,即可以半價購買來回纜車票一張。

Kelly Chu


hd