Executive日記——大熱天時包住頭匿樹林 山賊化身忍者龜 連環爆村屋

  Kelly好羨慕住村屋嘅朋友,實用面積高啲,又親近草草木木,但大家記住做好家居保安。一個住村屋嘅朋友話俾小妹知,呢兩日有差人去佢居住嘅西貢村屋,發生乜事呢?原來有山賊出沒,仲扮到好似忍者龜咁,已經有兩戶左鄰右里被爆竊。Kelly公開呼籲住獨立屋嘅朋友要小心門戶。



  朋友對Kelly話,日前回家,喺樓下見到三個便衣差人,原來附近被賊仔入屋爆格,佢形容差人好有禮貌,同佢傾咗一陣,說近來經濟變差,或者有人冇工開,所以鋌而走險,並留下連絡電話,叫佢見到有乜風吹草動就搵佢哋。

  朋友係一名好市民,佢真係目及到周圍實一實,畀佢從村嘅閉路電視有所發現,拍到一個人躲喺樹林中,應該係一個山賊。朋友形容呢個包晒頭嘅山賊,好似拍緊《忍者龜2020》套戲,「佢都幾忍得,又熱又焗又多蚊!」,Kelly睇完笑咗,但住村屋嘅朋友要做好家居保安,唔好畀山賊得逞。

Kelly Chu


hd